Mejmune bintu Harith r.a

Mejmune është gruaja e fundit me të cilën u martua i dërguari i Allahut a.s. Martesa mes tyre ndodhi nga fundi i vitit të shtatë hixhri. Kështu, Mejmune bintu Harith jetoi si grua e Profetit a.s dy vite. Ajo ishte një nga gjashtë motra dhe secila prej tyre u martua me figura të fisshme dhe sojli.

Nëna e saj quhej Hind bintu Auf dhe për të thuhet se ka gëzuar privilegje dhe ndere si asnjë grua tjetër. Kjo, sepse të gjashtë vajzat e saj u martuan me figura të ndritura të islamit. Një fakt i tillë, tregon dhe një herë që djemtë nuk janë më të mirë se vajzat.

Hindu bintu Auf krenohej me vajzat e saj dhe me dhëndurët, gjë e cila shpesh herë shkaktonte xhelozinë e shoqeve të saj.

Thotë Profeti a.s:"Kush ka tre vajza, i edukon ato, i arsimon dhe i mëshiron, Zoti do e shpërblejë me xhenet."

Një burrë që e dëgjoi këtë, e pyeti:"Po sikur dikush të ketë dy vajza o i dërguar i Allahut?"

Profeti a.s iu përgjigj:"Edhe nëse ka dy."

Thotë transmetuesi i këtij hadithi:"Për Zotin nëse dikush do e kishte pyetur "A vlen kjo për atë që ka vetëm një vajzë" do të ishte përgjigjur pozitivisht. Por neve na erdhi zor ta pyesim më shumë."

Motrat e Mejmune bintu Harith

Majmune ka motër Zejneb bintu Huzejme, një nga gratë e Profetit a.s e cilia kishte vdekur më parë.

Motra e dytë ishte Selma bintu Harith, gruaja e Hamza ibnu Ebi Talib.

Motra e tretë është Esma bintu Umejs. Fillimisht, ajo ishte martuar me Hamza ibnu Ebi Talib. Pasi Hamza u vra dëshmor, u martua me Ebu Bekrin. Pasi vdiq Ebu Bekri ajo u martua me Ali ibnu Ebi Talibin.

Motra e katërt është Lubabe El-kubra dhe ajo ishte gruaja e Abasit, xhaxhait të Profetit a.s. Ajo është nëna e Fadl ibnu Abas dhe ndryshe njihet me emrin Umu Fadl.

Motra e pestë është nëna e Halid ibnu Velidit, gruaja e Velid ibnu Mugire. Kështu, Mejmune bintu Harith është tezeja e Halid ibnu Velidit.

Martesa me Profetin a.s.

Ajo pranoi islamin bashkë me të shoqin në Meke, por pas disa kohësh, i shoqi i vdiq. Ai që kujdesej për të, ishte burri i motrës, Abas ibnu Abdul Mutalibi, njëkohësisht edhe xhaxhai i Profetit a.s.

Majmune bintu Harith nuk pati mundësi të emigrojë për në Medine bashkë me myslimanët e tjerë. Ajo e kishte të pamundur diçka të tillë, ngaqë ishte pa përkrahje. 

Në vitin e shtatë hixhri, kur ishte gjashtëdhjetë e një vjeç, Profeti a.s u martua me katër gra, një ndër to ishte dhe Mejmune. Këtë vit Profeti a.s u martua me Safijen, Marien, Umu Habibene dhe Mejmunen.

Në vitin e shtatë, Profeti a.s shkon në Meke bashkë me 1.400 myslimanë të tjerë për të kryer Umren, sipas marrëveshjes së Hudejbijes. Kurejshët, e dinin se të rinjtë e Mekes, do të ndikoheshin kur t'i shihnin myslimanët të bashkuar, të lidhur dhe të dashur me njëri-tjetrin. Që në aparencë, myslimanët i mahnitnin dhe i linin pa gojë të tjerët. Kurse sot, jemi ne myslimanët ata që mahnitet nga perëndimorët.

Kurejshët druheshin se mos të rinjtë e tyre, pranonin islamin duke parë forcën, krenarinë dhe unitetin e myslimanëve. Përderisa jemi të përkushtuar në fe dhe islamin e kemi me pasion, njerëzit influencohen dhe përqafojnë fenë tonë. Atë çast që heqim dorë nga islami, biem pre e imitimit të verbër. Thotë Profeti a.s:"Do të ndiqni traditat e popujve të mëparshëm pëllëmbë pas pëllëmbe. Ju do u shkoni pas, edhe nëse hyjnë në folenë e hardhucës."

Kjo ndodh, kur myslimani e humbet besimin dhe krenarinë tek feja të cilës i përket. çfarë identiteti ka një i ri, i cili vendos në ballë një flamur të një shteti tjetër? çfarë identiteti ka një i ri i cili ka ngritur në fund zërin e kasetofonit, ku këndohen këngë nga të cilat ai nuk kupton asnjë fjalë?

Kur myslimanët priteshin të hyjnë në Meke, kurejshët i urdhëruan të gjithë banorët që të dalin jashtë. Kjo ndodhte që të shmangnin çdo lloj kontakti me myslimanët. Ata i urdhëruan që të vendoseshin në kodrat e Mekes. Megjithatë, nuk ishin të sigurtë, pasi të rinjtë do i dallonin myslimanët nga kodrat. Për këtë, përhapën fjalë se myslimanët vuajnë nga një sëmundje lëkure, sidomos tek pjesa e supeve, gjë e cila i ka sfilitur fizikisht. Këtë sëmundje, gjoja, ata e kishin marrë gjatë qëndrimit në Medine.

Ndërkohë, Profetit a.s i mbërrijnë këto informacione dhe fillon të marrë masat menjëherë. Ai i urdhëroi të gjithë myslimanët, që supin e djathtë ta zbulonin – gjë e cila ka mbetur traditë për këdo që shkon të vizitojë Qaben – dhe tre xhirot e para rreth Qabesë t'i kryenin me trok.

Shohim që tavafi dhe vizita e Qabes, përveç vlerave shpirtërore dhe edukative, përmban edhe stërvitjen fizike, rregullin dhe disiplinën. Në këtë rit, demonstrohet fuqishëm burrëria, serioziteti, adhurimi, përkushtimi ndaj Zotit, disiplina, morali, edukata etj...

Me këtë, Profeti a.s u thoshte kurejshëve se myslimanët ishin shumë mirë nga shëndeti, ishin të fuqishëm, muskulorë dhe të disiplinuar. Një mijë e katërqind myslimanë, do të kryenin tavafin, sikur të ishin një trup i vetëm.

Të rinjtë mekas, duke parë këtë panoramë, mbetën pa fjalë. Ata i thonin njëri-tjetrit:"A për këta thonë që janë të sëmurë dhe të hallakatur?! Për Zotin, nuk kemi parë arabë më të fuqishëm dhe të disiplinuar se këta!"

Pas disa vitesh, kur Profeti a.s e kishte marrë Meken dhe kishte ardhur të kryejë Haxhin e lamtumirës bashkë me myslimanët e tjerë, i urdhëroi që tavafin ta kryejnë me supin të zbuluar dhe tre xhirot e para me trok.

Umeri ndërhyri dhe u tha:"O i dërguar i Allahut! Këtë e kemi bërë asokohe (kur nuk kishim triumfuar), përse duhet ta bëjmë dhe tani?!"

Profeti a.s ia ktheu:"Kjo është tradita ime o Umer."

Gjatë qëndrimit treditor të Profetit a.s në Meke, dëgjoi që Mejmune bintu Harith ishte e vetme dhe pa përkrahje në Meke. Ajo dhe motrat e saj, njiheshin ndryshe me nofkën "motrat besimtare".

Majmune bintu Harith, rridhte nga një familje sojlie dhe motrat e saj ishin të martuara me elitën e myslimanëve. Megjithatë, ajo nuk ishte një femër e bukur, ishte grua e ve dhe i përkiste asaj shtrese që nuk kishin përkrahje në Meke.

Kush mund të martohej me një grua të tillë?

Si në çdo rast tjetër, Profeti a.s kërkoi që nderi i saj të vendosej në vend. Ai mund të urdhëronte dikë tjetër të martohej dhe ta merrte në përkujdesje, por ai duhej të ofronte modelin më të mirë për myslimanët. Kështu, përveç arsyeve të tjera, martesat e Profetit a.s përmbanin një sasi të madhe sakrifice. Gjëja më e vështirë për një burrë, është që të martohet me një grua thjesht për ta përkrahur dhe jo ngaqë e do atë dhe tërhiqet prej saj. Nëse nuk do të ishte profet, ai nuk do e kishte bërë një sakrificë të tillë. Jo vetëm kaq, por edhe pas martese, ai i trajton me drejtësi, duke i kushtuar secilës prej tyre kujdesin që u nevojitej. Ai ishte i dhënë më shumë vetëm pas Aishes emocionalisht, por dashamirësinë, përkujdesin, fjalët e buta, drejtësinë etj... nuk ia kurseu asnjërës pa dallim.

Thotë Zoti në Kuran:"Dhe nuk të dërguam veçse si mëshirë për mbarë botrat."

Për t'u martuar me Mejmunen, Profeti a.s i kërkoi xhaxhait të tij Abasit dhe gruas së tij Umu Fadl (e cila ishte motra e Mejmunes) të kërkojnë dorën e saj.

Duke u martuar me Mejmunen, Profeti a.s u çonte një mesazh tjetër mekasve idhujtarë. Ai sikur u thoshte:"Edhe pse kemi nëntëmbëdhjetë vite armiqësi, luftë dhe urrejtje, unë pranoj të martohem nga mesi juaj dhe jam gati t'i hedh pas shpine gjithë këto vite konflikti."

Misioni i Profetit a.s – i cili është dhe duhet të jetë mision i çdo myslimani – është që njerëzve t'ju tregojë rrugën dhe t'i marrë përdore në xhenet. Nga kjo nuk bënte përjashtim askush, as ata që e kishin keqtrajtuar dhe dëbuar nga vendlindja e tij. Prej myslimanit nuk pranohet që t'ju thotë njerëzve:"Unë u tregova se çfarë është e drejtë dhe çfarë jo. Në e pranofshi mirë, në të kundërt vafshi në djall."

Ajo që i bëri mekasit të pranojnë islamin, janë pikërisht këto sakrifica të Profetit a.s, mëshira e tij, durimi, maturia, zemërgjerësia, urtësia etj...

Atë ditë që u martua me Mejmunen (ditën e tretë të qëndrimit të tyre në Meke), Profeti a.s vajti te kurejshët dhe u tha:"Unë sot jam martuar me një vajzë tuajën. Prandaj, a më lejoni që të qëndroj edhe nesër që të shtroj një gosti, ku të jeni të ftuar edhe ju?"

Ata ia kthyen:"Na u hiq sysh se nuk duam prej teje gosti."

Sad ibnu Muadh, nuk e mbajti dot veten dhe u tha:"A kështu qenka puna? Për Zotin toka është e Zotit dhe ky vend na përket edhe neve."

Profeti a.s i tha:"Mjaft o Sad! Ne u dhamë besën se do të qëndrojmë tre ditë dhe këto tre ditë përfunduan." Më pas, u drejtua myslimanëve të tjerë me fjalët:"Kush beson Zotin dhe botën tjetër, mos e gjejë perëndimi i diellit veçse jashtë Mekes."

Thirrja dhe ftesa islame nuk e njohin ashpërsinë, dhunën dhe imponimin. Ato njohin vetëm zemërbutësinë, urtësinë, mençurinë dhe moralet e larta.

Profeti a.s e kaloi natën e parë të martesës me Mejmunen në një vend që quhet Terif, 25 km larg Mekes. Është e çuditshme se pas tridhjetë vitesh, vendi ku do të ndërrojë jetë nëna jonë Mejmune është pikërisht ky vend. Ajo kishte vajtur të kryejë haxhin gje gjatë kthimit vdiq në atë vend.

Jeta e Mejmunes me Profetin a.s

Siç e cekëm dhe më lart, ajo jetoi me Profetin a.s vetëm dy vite. Duke qenë se ishte e bukur, Zoti i kishte dhënë një dhunti tjetër. Ajo gatuante shumë mirë dhe gjellë të ndryshme, gjë e cila i pëlqente shumë Profetit a.s. Gjithmonë, Profeti a.s preferonte të shkojë të hajë tek Mejmune. Një herë, ajo kishte gatuar mish dabbi (një lloj zvarraniku si hardhuca por më i madh) pasi kishte ardhur Halid ibnu Velidi, nipi i Mejmunes. Profeti a.s e pa duke gatuar dhe i tha:"çfarë ke gatuar sot?"

Majmune iu përgjigj:"Mish dabbi."

Kur ua vuri para ushqimin, Profeti a.s nuk foli por e hoqi pjatën mënjanë pasi nuk e pëlqente mishin e dabbit.

Halid ibnu Velidi e pyeti:"A është haram o i dërguar i Allahut?"

Profeti a.s ia ktheu:"Jo, por nuk është ushqim i fisit tim."

Tregon Halid ibnul Velid:"Unë e mora të gjithë mishin dhe e hëngra vetëm."

Mbi mënyrën si duhet ta kuptojmë traditën e Profetit a.s, duke të bëjmë dallim mes Profetit ssi njeri dhe Profetit si i dërguar i Zotit. Profeti njeri, hypte në deve, nuk hante mishin e dabbit etj... Të gjitha këto, janë shije që kanë të bëjnë me Profetin a.s si njeri. Profeti a.s, si i dërguar i Zotit, është në ato raste kur ai urdhëron ose ndalon.

Nëse Profeti a.s vishte xhelabije, ashtu siç vishen arabët sot, kjo nuk do të thotë që ne myslimanët të veshim xhelabije. Profeti vishej me xhelabije, sepse ajo ishte veshja e asaj kohe. Megjithatë, ai ka veshur edhe veshje tradicionale të popujve të ndryshëm. Në islam, çdo veshje është e lejuar, pantallona, xhaketë, kollare, këmishë etj.... përderisa e mbulon trupin dhe nuk është i tejdukshëm.

Një burrë kishte veshur një rasë murgjërish. Kur e pa Profeti a.s e pyeti:"A murg je ti?" Burri u përgjigj:"Jo."

Profeti a.s i tha:"Po përse je veshur kështu atëherë?! Vishu me rrobat e popullit tënd!"

Majmune transmeton jetën e Profetit a.s brenda në familje

Nëna jonë Mejmune, ka transmetuar shumë hadithe të Profetit a.s, sidomos ato që kanë të bëjnë me sjelljet e tij brenda në familje.

Një herë, pas vdekjes së Profetit a.s ishte përhapur mes myslimanëve të Medines që nëse gruaja është me të përmuajshmet, burrit nuk i lejohet të flerë me të në të njëjtin shtrat dhe nuk duhet të pijë nga e njëjta gotë. Kur i dëgjoi këto fjalë Mejmune, ndërhyri dhe tha:"Kush ua ka thënë këtë?! Nga e sollët?! Për Zotin, i dërguari i Allahut flinte me mua në një shtrat, edhe pse isha me të përmuajshmet. Mos jeni më të mirë se i dërguar i Allahut ?"

Në një transmetim tjetër, ajo thotë:"Unë dhe i dërguari i Allahut laheshim nga e njëjta enë. Unë i thosha:"ma lër ujin mua" dhe ai më thoshte "jo ma lër mua".

çdo burrë që ka nevojë të mësojë artin e komunikimit me të shoqen, model më të mirë se profeti Muhamed a.s nuk do të gjejë.

Në një hadith, ai thotë:"Më i miri prej jush, është ai që sillet më mirë me familjen e tij. Unë jam ai që sillem më mirë me familjen time."

Majmune dhe dëshira për të dhënë sadaka

Majmune bintu Harith njihet për dëshirën e saj të madhe, për të ndihmuar njerëzit e varfër. Aq shumë e kishte të theksuar këtë moral, saqë shpesh herë, hynte borxh me qëllim që t'u gjendej fukarenjve në nevojat e tyre.

Po ti o vëlla dhe oj motër, a e keni hob dhënien e sadakasë?

Unë u këshilloj që sa herë të keni ndonjë problem, të jepni sadaka. Thotë Profeti a.s:"Sadakaja e shuan zemërimin e Allahut, ashtu siç shuan uji zjarrin."

Nëse ke vepruar ndonjë gjynah, pastroje duke dhënë sadaka.

Vdekja e Mejmunes

Nëna jonë Mejmune bintu Harith, vdiq e fundit nga gratë e Profetit a.s. Siç e cekëm dhe më lart, ajo vdiq në Terif dhe atje u varros. Në të njëjtin vend ku u martua me Profetin a.s.

Ai që i fali namazin e xhenazes ishte Abdullah ibnu Abasi, djali i motrës së saj.

Kjo ishte nëna e besimtarëve Mejmune bintu Harith, Zoti qoftë i kënaqur me të.

Në fund, e lusim Zotin që të na bashkojë ne xhenet me nënat e besimtarëve dhe të jetë i kënaqur me ne të gjithë.