Tek porta e xhenetit

Emsioni njëzet e pesë

Tema e emisionit: Ushqimi i banorëve të zjarrit

Prezantues i emisionit: Mustafa Husni.

Këtë seri temash, do e mbyllim me temën rreth ushqimit të banorëve të xhehnemit. Ata do të jenë të pikëlluar dhe të penduar për veprat e tyre të liga në këtë botë. Ata janë të pikëlluar që e çuan jetën dëm, në qejfe, kënaqësi dhe epshe të shfrenuara.

Thotë Profeti a.s:”Banorët e zjarrit, ashtu siç do të vuajnë nga temperatura dhe dënimi, do të vuajnë edhe nga uria dhe etja. Ata do të kërkojnë diçka për të ngrënë dhe do u jepet një pemë shkretëtire gjithë gjemba.”

Ajo është një pemë e mbushur me gjemba, saqë edhe deveja e ka të vështirë t’a hajë, jo më njeriu. Thotë Zoti në Kuran:” Për ata nuk do të ketë tjetër ushqim, përveç ferrave helmuese.” (Gashije 6)

Ata do të hanë nga e keqja, por gjembat do u ngulen në buza dhe kudo. Thotë Profeti a.s:”Do u jepet edhe ushqim që u ngecet në fyt, u furet.”

Thotë Zoti në Kuran:” ushqime që ngecin në fyt dhe dënime të dhembshme.” (Muzemmil 13)

Kurse në një ajet tjetër, Zoti thotë:” Ne kemi përgatitur për mohuesit keqbërës një zjarr, që do t’i rrethojë nga të gjitha anët (si çadra). Nëse do të kërkojnë ndihmë, do t’u jepet një ujë si xehja e shkrirë, që do t’ua përcëllojë fytyrat. Sa pije e tmerrshme është ajo e sa strehim i keq është ai (zjarri)!” (Kehf 29)

Thotë Profeti a.s:”Me t’ju afruar ujin, do u shkrihet lëkura e kokës, për shkak të temperaturës së lartë të ujit.”

Në një hadith tjetër, Profeti a.s thotë:”I lumi ai që më ka parë dhe më ka besuar. Pastaj, i lumi, i lumi, i lumi ai që ka besuar në mesazhin tim, pa më parë mua. Në xhenet, ndodhet një pemë, hija e të cilës nuk përshkohet nga një kalorës as për njëqind vite.”

Kurse mbi pemën që ndodhet në ferr, thotë Zoti i madhëruar:” Njëmend, kjo pemë del nga fundi i Zjarrit flakërues dhe frutet e saj janë si kokat e djajve. Me të vërtetë, ata do ta hanë këtë frut dhe me të do ta mbushin barkun.” (Saffat 64-66)

Ajo është pikërisht pema që njihet me emrin Zekkum. Thotë Zoti i madhëruar rreth kësaj peme:” Me të vërtetë, ata do ta hanë këtë frut dhe me të do ta mbushin barkun. Pastaj, ata do të kenë një përzierje me ujë të nxehtë (për të pirë) e pas kësaj, me siguri, kthimi i tyre do të jetë në Zjarrin flakërues.” (Saffat 66-68)

Thotë Profeti a.s:”Nëse vetëm një pikë nga përzierja e nxjehtë e ferrit do të binte në këtë dynja, do ua turbullonte jetesën banorëve të kësaj toke, për shkak të erës që kutërbon prej saj.”

Përse të jesh nga ata që do shijojnë këtë dënim të rëndë, ndërkohë që Zoti i madhëruar të pret krahëhapur çdo ditë, me qëllim që të pendohesh për gjynahet e vepruara natën dhe të pret natë, për t’u penduar nga gjynahet e vepruara ditën?

Që të evidentosh dënimin e botës tjetër, duhet të pendohesh dhe t’a lidhësh zemrën me vendet më të dashura të Allahut, xhamitë.

Thotë Profeti a.s:”Për atë shkon ose kthehet nga xhamia, Zoti i pregatit zijafet sa herë që shkon dhe vjen.”

Kështu, xheneti i takon atyre që frekuentojnë xhamitë, vendet më të dashura të Allahut të madhëruar.

Me qëllim që të lidhesh me xhamitë dhe t’i frekuentosh ato, unë të këshilloj që të qëndrosh larg pijeve alkolike, drogave dhe çdo lloj harami tjetër.

 Thotë Profeti a.s:”Zoti është zotuar se kushdo që do të pijë alkolin në këtë botë, do i jepet të pijë qelbin e banorëve të zjarrit në botën tjetër.”

Ndërkohë, banorët e xhenetit janë duke shijuar momente dhe çaste shumë të pritura për ta. Ata do të jenë duke shijuar premtimin e Zotit të madhëruar dhe të Profetit të Tij.

Thotë Profeti a.s rreth banorëve të xhenetit:”Zemrat e tyre do të jenë si një e vetme.”

Nuk ka më zënka, mëri, konflikte dhe shamata. Ata ulen me njëri-tjetrin dhe diskutojnë rreth atyre veprave të mira, të cilat u bënë shkak që të shijojnë kënaqësitë e xhenetit.

Thotë Zoti i madhëruar në Kuran rreth këtij fakti:”Ata do të afrohen, duke biseduar me njëri-tjetrin e duke thënë: “Më parë, Ne kemi pasur frikë në familjet tona (nga gjykimi i Allahut),  por, Allahu na ka dhuruar mëshirë dhe na ka ruajtur nga era përcëlluese (e Zjarrit). Ne qysh më parë i jemi falur Atij. Ai është vërtet Bamirës dhe Mëshirëplotë”. (Tur 25-28)

“Ne do ta shkulim urrejtjen nga kraharori i tyre. Te këmbët e tyre do të rrjedhin lumenj dhe ata do të thonë: “Qoftë lavdëruar Allahu që na udhëzoi në këtë. Ne nuk do të ishim udhëzuar, sikur të mos na udhëzonte Allahu. Pa dyshim, të dërguarit e Zotit tonë kanë sjellë të vërtetën”. (Araf 43)

Një zë do u thotë:” Dhe një zë do t’i thërrasë: “Ky është Xheneti që ju e keni merituar për atë që keni punuar”. (Araf 43)

Mes banorëve të xhenetit dhe atyre të zjarrit, do të zhvillohet një dialog interesant. Këtë e tregon Zoti në Kuran ku thotë:” Dhe banorët e Xhenetit do t’u thonë banorëve të zjarrit: “Ne e gjetëm të vërtetë atë që na premtoi Zoti ynë. Po ju, a e gjetët të vërtetë atë që ju premtoi Zoti juaj?” Ata do të thonë: “Po!” Atëherë, një lajmëtar midis tyre do të thërrasë: “Mallkimi i Allahut është mbi keqbërësit, të cilët i kanë penguar të tjerët nga rruga e Allahut, duke dashur ta shtrembërojnë atë dhe nuk kanë besuar në jetën tjetër!” (Araf 44-45)

Kurse përgjigja e banorëve të zjarrit do të jetë:” Banorët e zjarrit do t’u thërrasin banorëve të Xhenetit: “Derdhni pak ujë te ne ose diçka nga ajo që ju ka dhuruar Allahu!” Ata thonë: “Në të vërtetë, Allahu këto i ka ndaluar për mohuesit, të cilët e morën fenë për lojë dhe argëtim dhe u mashtruan nga jeta e kësaj bote”. Ne sot do t’i harrojmë ata, ashtu siç e patën harruar ata takimin e kësaj Dite dhe siç mohuan shpalljet Tona.” (Araf 50-51)

Banorët e zjarrit do të fillojnë të mallkojnë njëri-tjetrin për situatën ku ndodhen. Këto momente i përshkruan Zoti në kuran:” Dhe, kur të grinden në Zjarr, të dobëtit do t’u thonë eprorëve që madhështoheshin: “Ne ishim ithtarët tuaj, ndaj, a mund të shmangni prej nesh një pjesë të dënimit tonë?” Ata që madhështoheshin, do të thonë: “Të gjithë ne jemi në zjarr. Allahu tashmë i ka gjykuar robërit e Tij”. (Gafir 47-48)

Ne e lusim Zotin që të jemi nga banorët e xhenetit dhe të mos jemi banorë të xhehnemit qoftë dhe për një çast të vetëm.

Ai na ka bërë thirrje që të ndjekim fenë dhe udhëzimet e Tij. Thotë Zoti në Kuran: ”Ndiqni më të mirën e asaj që ju është shpallur nga Zoti juaj, para se t’ju vijë dënimi papritmas, pa e ndier atë, që të mos thotë njeriu: “Mjerë për mua që nuk i kam kryer detyrimet ndaj Allahut, madje, edhe jam tallur!” Ose të thotë: “Sikur Allahu të më kishte udhëzuar, do të isha bërë njeri i devotshëm”. Ose të thotë, kur ta shohë dënimin: “Ah, sikur të ishte e mundur për t’u kthyer edhe një herë e të bëhesha njeri i mirë”! (Allahu do t’u thotë): “Me të vërtetë, juve ju erdhi shpallja Ime (Kurani), por nuk besuat dhe u bëtë mendjemëdhenj e jobesimtarë”. Në Ditën e Kiametit do t’i shihni ata që kanë trilluar gënjeshtra për Allahun, me fytyra të nxira. Vallë, a nuk është Xhehenemi vend për ata që janë mendjemëdhenj?! Por Allahu do t’i shpëtojë ata që janë ruajtur me të mirat e bëra, prandaj ata nuk do t’i prekë e keqja e as nuk do të pikëllohen. . Allahu është Krijuesi i çdo gjëje dhe Ai është Mbikëqyrës i çdo gjëje.” (Zumer 55-60)

Veshjet e banorëve të xhenetit

Një nga muslimanët, vajti tek i dërguari i Zotit a.s dhe e pyeti:”O i dërguar i Zotit! Dua të pyes rreth veshjeve të xhenetit! A do të jenë të krijuara, gati për ne, apo do të qepen?!”

Profeti a.s iu përgjigjt:”Ato do të dalin nga frutat e xhenetit.”

Pra, frutat e xhenetit, do të çahen dhe prej tyre do të dalin veshje nga më të ndryshmet. Ato do të jenë dhuratë nga ana e Allahut të madhëruar dhe banorëve do u jepen pa vuajtur dhe pa derdhur djersë.

Kurse për veshjet e banorëve të zjarrit, thotë Zoti në Kuran:” Besimtarët dhe jobesimtarët grinden për Zotin e tyre, por për ata që nuk besojnë janë përgatitur rroba prej zjarri, e mbi kokat e tyre do të hidhet ujë i valuar, me të cilin do t’u shkrihen ç’kanë në barqe dhe lëkura. Për ata ka kamxhikë prej hekuri.”

(Haxh 19-21)

Në një ajet tjetër, Zoti thotë:” rrobat do t’i kenë prej katrani e zjarri do t’ua mbështjellë fytyrat.” (Ibrahim 50)

Në fund të kësaj teme, e lusim Zotin që të na bëjë nga banorët e xhenetit dhe të na ruajë nga ndëshkimi i Tij i dhimbshëm.

Le të lutemi për të gjithë miqtë dhe të njohurit tanë, me qëllim që edhe melekët të luten për ne.

Në fund, paqja e Zotit qoftë mbi ju!